Kristín I. Mogensen

2003-05-25T16:01:00.000Z

Þetta hefur verið fínn tími undanfarið. Eftir að við lukum við lokaverkefnið tók ég mér 5 daga tölvufrí og fór að sinna ýmsu sem setið hefur á hakanum innan og utan heimilis. Ég skrifaði smá inn á webCT hjá Láru í dag svo nú verður bara haldið áfram. Mun væntanlega hitta þær stöllur á Tapas í kvöld.Við ætluðum að hittast án tölvu og spá í framhaldið.

2003-05-23T22:51:00.000Z

Mínar kæru samstarfskonur. Hér kemur uppskriftin að fiskisúpunni sem ég lofaði ykkur um daginn. En munið að þetta er aðeins grunnur. Þið getið leikið ykkur að vild.Sumt notið þið, öðru bætið þið við o.þ.h.
Olía í pott, skerið smátt og léttsteikið.
paprika
laukur
blaðlaukur
gulrætur
sellerí
chilipipar
hvítlaukur.
kjötkraftur
rækjur, lúða, ýsa??
hvítvín
fisksoð
pínu púðursykur
salt, pipar, rjómi
Niðursoðnir tómatar settir út í. Kjötkrafti, fiskikrafti og kryddi bætt út í og soðið við vægan hita í ca. 45 mín. Rétt áður en borið er fram er fiskinum bætt út í og bætt með rjóma.

Eftirrétturinn sem aldrei var borinn fram og heitir Í tímahraki
Hálfur lítri rjómi, þeyttur
einn döðlubotn, einn hrísbotn (keyptir í búðinni) rifnir út í.
Út úr þessu kemur þykkt bragðgott mauk.
Að lokum 1 plata brætt suðusúkkulaði og 2 msk sýrðum rjóma blandað saman og hellt yfir. Skreytt að vild.

Verði ykkur að góðu

2003-05-20T18:36:00.000Z

Búin með verkefnin. Mun eiga frí fram að helgi.

2003-05-19T12:43:00.000Z

Hún klikkar ekki ferðin norður í land.Allt gekk að óskum. krakkarnir alveg æðislegir. Við hittumst í gærkveldi og lukum við verkefnið þannig séð. Í dag mun ég ljúka við fínissurnar og skila í kvöld. Ég er með vangaveltur um einstaka þætti en einhvers staðar verður að hætta.

2003-05-14T11:20:00.000Z

Við unnum baki brotnu í lokaverkefninu hér suður frá í gærkveldi. Það sýnir sig að við erum langt komnar en fínissurnar eru eftir. Hittumst næst á sunnudaginn í Rvk.
Ég er að leggja af stað norður í land eftir hálftíma. Við 10. bekkjakennarar og eitt foreldri förum norður í Skagafjörð og verðum þar fram á föstudag. Spáin er góð og veit ég af reynslu að svona ferð er mikil upplifun fyrir krakkana og það sem stendur venjulega uppúr er rafting niður Jölulsá vestari.
Þið stöllur, sýnið biðlund uppskriftirnar koma næst.

2003-05-11T12:25:00.000Z

Það er svo mikið að gera að ég gleymi hreinlega að blogga. Við stöllurnar hittumst þrisvar í síðustu viku og síðast í gær. Það gekk voða vel og við erum langt komnar með verkefnin. Við sátum á bókasafninu þar til okkur var hent út eftir 5 tíma setu.Næst hittumst við hér suður frá á þriðjudaginn.

2003-05-06T23:28:00.000Z

Það er ótrúlega mikið að gera þessa stundina. Allir kennarar vita hvert álagið er á þessum tíma í skólanum og síðan bætast lokaverkni nkn við. Ég hitti stelpurnar sl. mánudag og við munum hittast aftur nk. fimmtudag. Ég er smám saman að koma sjá heildarmyndina en þetta kemur og enn stefni ég á að ljúka öllum lokaverkefnunum fyrir miðjan maí. Mig langar í nokkurra daga pásu áður en sumarönnin hefst þann 23. maí.
Í dag kom bréf frá Berki Hansen um að ég væri komin inn aftur næsta vetur. Ég er ánægð með það.

2003-05-05T09:53:00.000Z

Helgin fór í árshátíð og vinnu við lokaverkefnið. Það verður um UT í Grunnskóla Grindavíkur og er einn hluti þess nærri búinn. Ég hugleiddi kennsluvefinn en er ekki alveg komin á beinu brautina hvað það varðar.

2003-05-02T12:55:00.000Z

Þá er fyrsta samræmda prófinu lokið. Mér fannst prófið að sumu leyti einfaldra nú en oft áður. Nemendur fengu að sýna hvað þeir kunnu en fóru ekki í gegnum endalausa hringstiga í áttina að svarinu. Þeim finnst venjulega bókmenntatextarnir erfiðastir en mér fannst svarmöguleikarnir við hlustuninni snúnari nú en oft áður.
Ég ætlaði sko aldeilis að vinna í gær en barnapía barnabarnanna klikkaði illilega og hvað gera foreldrarnir? Þeir kalla á ömmu þótt hún sé á kafi í miðju lokaverkefni. En dagurinn með þeim var ánægjulegur og ég veit að ég eyði ekkert of miklum tíma með þeim.
Ég er komin af stað í kennsluverkefninu mínu og er að vinna samhliða að lokaverkefninu. Reyndar næ ég engri vinnu í dag og árshátíð starfsmanna verður í kvöld. En helgin er framundan og ætti ég að geta unnið helling fram að vinnufundi hjá okkur stelpunum.

2003-04-30T14:17:00.000Z

Ég fór til RVK í gærkveldi, hitti stelpurnar og það var ansi gott. Við erum komnar af stað í lokaverkefnið og það er farið að taka á sig mynd allavega huglæga. Við höfum úr mörgu að moða fyrir næsta vinnufund sem verður á mánudaginn. Mér finnst þetta allt annað líf að vera í samstarfi þrátt fyrir keyrsluna á milli. Stundum virkar hún nefnilega á mig sem hvíld.

2003-04-27T16:57:00.000Z

Þá er væntanlega komið að því að fara að hugsa og framkvæma í nkn. Ég er ofboðslega ánægð með að vera í samstarfi við stöllurnar Lilju, Berglindi og Guðrúnu Jónu. Hugmyndirnar eru komnar í grófum dráttum og heimavinnan fyrir þriðjudaginn er að lesa í fræðunum.Ég sé að margir eru komnir áleiðis með kennsluvefinn.

Það var voða fínt á Örkinni um helgina. Í gærmorgun skruppum við á Selfoss, minn heimabæ, ókum um og ég keypti mér skvísuföt í Lindinni . Fín verslun sem hefur verið til húsa á sama stað síðan 1975. Síðan borðuðum við á Menam, tælenskum veitingastað á Selfossi. Góður matur á góðu verði. Í gærkveldi voru margir og mismunandi hópar á staðnum í mat og gistingu. Greinilega nóg um að vera hjá þeim þessa helgi. Á ballinu komst ég að því að bassaleikarinn í hinni geysivinsælu hljómsveit Pass er fyrrum nemandi minn, sem er jú allt í lagi með en að það skuli vera 30 ár síðan! Það finnst mér lyginni líkast. En þetta passar því það eru nákvæmlega 30 ár síðan ég kenni fyrst.
Í gær var fínt veður og fórum við hjónin í golf hjá Golfklúbbi Hveragerðis inni í Gufudal. Þetta var í fyrsta skipti sem við spilum þann völl. Hann er bráðskemmtilegur en ansi langt labb frá flöt að næsta teig í mörgum tilvikum.
Á heimleiðinni komum við við í nýja veitingahúsinu Hafið Bláa við Óseyrarbrúna og fengum okkur kaffi. Það var hávaðarok og útsýnið ekki síðra þess vegna. Fallegur staður.

2003-04-25T14:04:00.000Z

Ég er ekki fyrr komin úr páskafríi frá tölvunni að mér var boðið á Örkina og ekki verður tölvan með þar. Enn eitt er víst að golfsettið verður tekið með enda margir góðir vellir fyrir austan fjall. Ég verð að leggjast yfir heimavinnu lokaverkefnisins af fullum krafti á sunnudaginn.

2003-04-24T16:50:00.000Z

Þessi mynd finnst mér vera lýsandi fyrir okkur þessar gömlu í framhaldsnáminu.
Við erum komnar upp á hjólabrettið og getum ekki beðið eftir því að komast áfram!

2003-04-24T15:26:00.000Z

Ég er byrjuð í golfi aftur. Þetta er nú ekkert smá skemmtilegt og ég kem líka svona vel undan vetri. En við vitum öll hvernig það er. Um leið og eitthvað reynir á skilur maður ekkert í vitleysunum sem maður gerir. Völlurinn okkar hér í Grindavík kemur vel undan vetri en það er verst að geta ekki eytt eins miklum tíma og ég vildi. Við Guðrún Jóna, Berglind og Lilja hittumst á Kaffi Nauthól í gærkveldi. Þar viðruðum við hugmyndir að sameiginlegu lokaverkefni. Við munum hittast aftur á þriðjudaginn í KHÍ.

2003-04-23T14:29:00.000Z

Ég hef mikið verið að hugleiða staðbundnu lotuna. Þuríður fín og Björn stóð sig vel eins og alltaf áður og mér fannst ágætt að meta verkefnin hjá hvort öðru. Það rifjaði upp ýmislegt eins og já ég man að ég kunni ekki ... þegar ég vann þetta verkefni o.s.frv.
En eitt fannst mér ekki sniðugt og fullseint að vinna með. það var upprifjunin í dreamweaver. Við erum flest okkar um allt land búin að sitja sveitt yfir einföldustu atriðum frá janúar og fram í apríl.
Við fengum kennslu í janúar en mörg okkar vorum jafnnær því að allt var svo nýtt fyrir okkur. Þannig að við hefðum þurft meiri tíma í upphafi. Þeim tíma hefði verið mjög vel varið.
Einnig hefði mátt skipta hópnum upp eftir getu. Tæknin þvældist of lengi fyrir mér svo ég náði ekki að vinna innihaldið sem skiptir máli. Ég hafði tök á að mæta í laugardagstíma og græddi yfirleitt á þeim en samt. Mér finnst aðferðafræðin ekki rétt. Ég skil þá sem misstu einbeitinguna og fóru að blogga í staðbundnu lotunni.
Við erum að fara af stað í lokaverkefnið og hlakka ég til að byrja á því og vinna með þeim stöllum í UT-verkefninu.

2003-04-21T19:34:00.000Z

Þá er búið að gera alveg heilmikið. Við höfum málað og parketlagt en áttum ekki nógu mikið af gólflistanum svo verkinu lýkur væntanlega á morgun og getum við komið öllu fyrir og ég farið að einbeita mér að nkn og Grunnskólanum. En hér koma langþráðar myndir
úr samkvæminu hjá Kristínu Steinars.
Ég skil ekkert í því hvað ég tók fáar og einsleitar. En svona er þetta bara.

2003-04-18T20:08:00.000Z

Ég stalst í tölvu. Við erum hentum öllu út af neðri hæðinni í gærmorgun. Við höfum málað og erum að parketleggja. Allt tekur þetta óratíma. En draslið sem ég flutti úr íbúðinni. Ég kvíði mest fyrir að koma öllu fyrir aftur því ég verð greinlega að þrífa hvern einasta fersentimeter sem fer aftur inn. Ég er alvarlega að hugsa um að henda einhverju. Ekki það að ég skipti yfir í naumhyggjustefnu en það hlýtur vera einhver millivegur.Ég náði ekki að vinna myndirnar áður en atið hófst. Geri það við fyrsta tækifæri. Ég veit núna af hverju mér gekk svona illa um daginn. Það er svo aulalegt að það tekur ekki tali.. Það er eins og ég verði alltaf að æfa mig í öllu svo ég gleymi ekki einföldustu atriðum. Ég er líka voða fegin að hafa lesið um svipaðar hugsanir hér á blogginu. Við erum mörg á svipuðu róli hvað þetta varðar. Hvernær skyldum við fá að vita um framhaldið, hvort við séum skráð næsta vetur í KHÍ.

2003-04-13T22:15:00.000Z

Reyni á ný

2003-04-13T20:18:00.000Z

Reyndi en ekkert gekk.

2003-04-13T16:00:00.000Z

Reyndi að setja inn myndirnar frá því á föstudaginn. Gekk ekki. Reyni aftur á eftir

2003-04-10T11:23:00.000Z

Það verður stuð að mæta í Kennó á morgun.Hef verið að skoða verkefnin mín, breyta og bæta en það er eitt sem ég næ ekki sambandi við. Það eru rammarnir í kringum vefleiðangurinn . Þeir fara á flug niður á við. Mig langar til að vita hvað er að.

2003-04-07T21:31:00.000Z

Ég hef verið óvenju dugleg að skoða dreamweaver um helgina.Rifja upp og þreifa mig áfram. Ég geri samt engar breytingar í bili. Samkennari minn kom með hugmynd að lokaverkefni. Ætla að skoða hvort það gengur. Það væri fínt að fá dagskrá fyrir helgina. Ég vil gjarnan vita á hverju við eigum von.

2003-04-04T21:05:00.000Z

ÉG MINNI Á SAMKVÆMIÐ
HEIMA HJÁ KRISTÍNU STEINARS
NÆSTA FÖSTUDAGSKVÖLD
Sjá á vefborðinu, frímínútur, partý

Ég var að ljúka við glærurnar og textana sem fylgja þeim. Í augnablikinu er ég tvístígandi með morgundaginn. Sé til í fyrramálið hvað ég geri.

2003-04-02T22:01:00.000Z

Það er mikið að gera í skólanum og hef ég lítið sinnt náminu. Þó náði ég að leggjast yfir glærusýninguna í kvöld og reyni að útbúa textann með glærunum um helgina. Ég verð að leggjst aðeins yfir heimasíðuna og leika með fínissur sem ég hef verið að læra.

2003-03-29T17:47:00.000Z

Fékk tölvuna mína aftur í gærkveldi.Búið er að strauja hana. Nú er ég komin með windowsXP og officeXP og allt. Þökk sé Hrafni, syni mínum.
Ég þori ekki fyrir mitt litla líf að spyrja hann hvað ég geti gert fyrir hann í staðinn. Hvað ef hann biður mig um að passa á hánnartíma í golfi???
Ég verð bara á láta mér detta eitthvað til hugar og helst áður en ég fæ lánaða stafrænu myndavélina hans út af næsta verkefni.
Búin með rannsóknina og kóðunina og skrifaði smá hugleiðingu inn á nám og kennslu/Webboard um upplifun mína.

2003-03-28T07:56:00.000Z

Fartölvan mín er í upphalningu þessa dagana þannig að ég verð að hlaupa upp á loft til að fá tölvuskammtinn!
Náði ekki að setja inn rannsóknina frá því í gær en geri það væntanlega í dag.
Ég held ég fari ekki í Kennó í fyrramálið. Kominn tími á laugardagsfrí heima hjá sér.

2003-03-26T22:14:00.000Z

Ég var að koma úr Álftamýrarskóla. Við fengum leiðsögn í alls konar skemmtilegum aðgerðum í dreamweaver. Það er alveg ótrúlegt hvað ég þarf að endurtaka aftur og aftur einföldustu til að skilja. Ég er örugglega ekki af upplýsingakynslóðinni það er eitt sem víst er.Á morgun fer ég í seinni hluta rannsóknarinnar hjá Sólveigu. Það var fínt að fá viðbrögðin frá Láru. Ég er byrjuð að skoða næsta verkefni sem á að vera nokkuð klárt fyrir næstu staðbundnu lotu. Við vorum ekki alvg sammála um hversu mörg verkefni eru eftir á þessari önn. Sumir sögðu tvö en aðrir þrjú. Trúlega veit það einhver og svarar því í spjallglugganum.

2003-03-23T20:40:00.000Z

Þá er lokið fyrri hluta rannsóknarinnar. Ég hef setið yfir henni og kóðuninni seinni partinn í dag. Einnig lauk ég við greinargerð um framkvæmdaáætlunina og sendi Sólveigu .Í gær fór ég inn í Kennó í tíma hjá Birni. Hann var að vanda skilmerkilegur og lærði ég helling í myndvinnslu.
Þær eru ansi skemmtilegar samræðurnar sem eiga sér stað milli okkar nemendanna í þessu námi, þegar við hittumst. Við höfum sömu tilfinningu fyrir mörgum hlutum t.d. aðferðafræðinni sem beitt er. Upplifun okkar í staðbundnu lotunum o.lf. Það er dálítið gaman að spá í þetta.

2003-03-21T15:36:00.000Z

Í gær gerði ég rannsókn á tveimur drengjum í 10. bekk. Þeir eru báðir nemendur mínir en voru tí tíma í upplýsingatækni. Áður en ég set rannsóknina inn þarf ég að fá smá upplýsingar um opnu kóðunina. Skiptir hún kannski ekki máli?
Hef líka fengið leyfi hjá foreldrum tveggja stúlkna en hvorug þeirra var mætt í gær þannig að ég fékk frest á þær fram á næsta fimmtudag.
Þá ætti allt að vera komið í eðlilegt horf aftur eftir mikinn árshátíðarundirbúning.

2003-03-20T11:58:00.000Z

Loksins, loksins
Saga Kristín Helgadóttir kom í heiminn kl. hálf ellefu í dag.
Er þetta ekki dásamlegt?

2003-03-19T16:42:00.000Z

Vegna undirbúnings fyrir rannsóknina ræddi ég við tölvukennarann og tók hann mjög vel í að ég kæmi inn í tölvutíma hjá 10. bekk á morgun 20. mars.
Sl. mánudag fór ég inn í bekkinn minn með númer í hatti. Ég sagði þeim frá rannsókninni og bað þau um að taka þátt og þau sem vildu það ( tveir af hvoru kyni) drógu síðan um það hver hreppti hnossið. Þau tóku vel í þetta en vegna árshátíðarundirbúnings verða nokkrir fjarverandi. Í dag var ein daman fjarverandi vegna veikinda svo ég sé til hvað gerist á morgun. Alla vega hef ég fengið skriflegt leyfi hjá foreldrum hinna þriggja og skólastjórn. Ég hef lesið gögnin um rannsóknina yfir aftur og aftur og eins hef ég horft á vídóklippið frá Sibbu. Ég er ekki alveg 100% viss um kóðunina ennþá en það kemur eins og allt annað í þessu námi sem ekki skilst í fyrsta, öðru eða þriðja.
Í síðustu viku sendi ég beiðni inn í KHÍ þess efnis að ég yrði skráð í 30 einingar í stað 15 næsta vetur.

Enn bíðum við bara og bíðum eftir fréttum frá Hammerfest. Nú eru liðnir tveir sólarhringar síðan vatnið fór. Það virðast allir vera pollrólegir þarna norðurfrá.

2003-03-18T15:57:00.000Z

Það er merkilegt hvað biðin getur reynst löng. María missti vatnið fyrir sólarhring og er verið að setja hana af stað núna sólarhring seinna.
Við bíðum bara og bíðum.

Vona að ég nái að skoða lög í dreamweaver í kvöld.

Reyndar þarf ég líka að huga að bakkesli fyrir Selfossferðina á morgun vegna 100 ára afmælisins hans afa.

2003-03-16T22:38:00.000Z

Í dag er ég búin að sitja meira og minna við tölvuna. Ég er nú eiginlega farin að velta fyrir mér í hvað tíminn hafi farið áður en ég byrjaði í þessu blessaða framhaldsnámi. Margrét, tengdadóttir mín segir að áður hafi tíminn farið í mannleg samskipti en í allan vetur hafi ekki verið hægt að ná sambandi nema panta tíma!!
Þetta kemur svo sem heim og saman við að mér finnst stundum ég ekki eiga mér líf eins og nemendur mínir í 10. bekk segja og kvarta undan þegar ég rek þau miskunnarlaust áfram. Ég byrja alltaf með góðum ásetningi. Eingöngu að einbeita mér að verkefni dagsins og gera það á tíma. En áður en blikka augum er ég búin að skanna allar heimasíður nemenda nkn03 og bloggið að auki. Þar með er dágóður tími farinn og ég ekki byrjuð á verkefni dagsins.

Ekkert gerist ennþá norður í Finnmörku, þau slaka bara á á sjúkrahóteli. Inger, tengdamamma, ætlar meira að segja heim tilbaka á morgun.
Verð að muna eftir að taka gemsann með í vinnuna á morgun.

2003-03-16T13:42:00.000Z

Gærdagurinn var æðislegur. Ég sat lítið við tölvuna, fór til höfuðborgarinnar til að hitta mínar kæru í sumaklúbbnum.Ég tók nokkrar myndir af þeim til að setja inn á heimasíðuna við tækifæri. Fór með Helgu systur á About Schmidt. Hún var alveg æðislega skemmtileg og nærandi. Á eftir fórum við systurnar á Tvo fiska og fengum okkur indælis súpu.

Þá er komið að því. Nú rétt áðan hringdi síminn og eru þau Helgi sonur minn og María, norska kærastan hans komin á fæðingardeildina í Hammerfest. Þetta er fyrsta barn þeirra og má alveg eins búast við langri bið.

Á meðan ætla ég reyna að einbeita mér að lestri af slóðum Láru og koma ensku útgáfunni á vefinn.

Það tókst og er enska útgáfan komin inn á heimasíðuna/skilasíðuna. Þökk sé Gerði, sem var mér heldur betur innan handar.
Net based teaching and learning 2003

2003-03-14T20:35:00.000Z

Lauk við íslenska hlutann af Nýtingu í skólastarfi í umsjón Láru Stefánsdóttur.

Nýting í skólastarfi

Einnig er hægt að fara héðan inn á slóðina í gegnum heimasíðuna.

2003-03-13T11:43:00.000Z

Seint í gærkveldi vann ég drög að síðu á íslensku í áfanga hjá Láru.Ég náði líka að tengja síðuna vð skilasíðuna, sem kemur strax í ljós þegar heimasíðan er opnuð en þarf aðeins að leggjast yfir tenginguna. Skoða það þegar ég kem heim í kvöld. Enn veit ég ekki hvað gera á við lesefnið sem Lára vill að við leggjumst yfir. Mér hefur helst dottið í hug að umræða fari fram á vefborðinu. Kannski veit það einhver þarna úti?

2003-03-11T20:39:00.000Z

Nú hafa borist bréf frá Salvöru og Láru um næstu skref og er ég farin að að velta fyrir mér síðunum tveim, sem Lára vill að við gerum. Eitt skil ég ekki. Hvað á að gera við lesefnið, sem hún vill að við lesum? Verður kannski bara umræða um það á vefborðinu? Hef verið að lagfæra heimasíðuna, samræma síður ofl.

2003-03-09T18:23:00.000Z

Greinargerð til Láru Stefánsdóttur.

Punktar um ferð á UT2003 til Akureyrar.

Föstudagur 28. febrúar.

Tilgangur ferðarinnar til Akureyrar var UT2003 ráðstefna um upplýsingatækni í skólastarfi en hún var haldin í fyrsta skipti utan Reykjavíkur, í Verkmenntaskólanum á Akureyri 28. febrúar til 1. mars. Þarna var hægt að hlusta á fyrirlestra og taka þátt í málstofum. Fyrirtæki kynntu ráðstefnugestum einnig það nýjasta í tækninni á markaðnum.

Eftir opnunaratriðin á föstudeginum var ansi gaman að hlusta á Guðrúnu Þengilsdóttur flytja sína reynslusögur um Að vera eða vera ekki með fartölvu í bekk.Mér fannst hún koma inn á marga þætti, á bráðskemmtilegan hátt, sem við höfum rætt um í haust. Um tæknina, aðgengið að henni og viðhorf til hennar. Ég þóttist heppin að komast að í Málstofu Frosta Heimissonar en fyrirsögnin var Námsefnið á Netið. Það kom fljótlega í ljós að fyrirsögnin var ákaflega villandi og af öllu því sem mig langaði á hefði ég seint valið forritakynningu. Ég valdi málstofu Sigurbjargar Jóhannesdóttur, sem annað efnið til umfjöllunar, Mötun eða sköpun. Notkun margmiðlunar í kennslu. Hún leggur áherslu á að margmiðlun sé alls ekki bara tengd tölvum. Margmiðlun er m.a. texti, grafík, hljóð, hreyfimynd og myndbönd.
Lagði Sigurbjörg áherslu á að margmiðlun og fjölgreindarkenning Gartners geta átt samleið. Margmiðlunin ein og sér skiptir ekki endilega máli heldur verður að skoða kennsluhætti upp á nýtt með tæknina í huga.

Margmiðlun:
1. Auðgar kennsluna
2. Nær til fleiri nemenda
3. Fjölbreyttar kennsluaðferðir höfða til mismunandi námsgreinda nemenda.

Sköpun í kennslu:
Nemendur verða virkari
Ýtir undir sjálfstæði
Krefst frumkvæðis
Nemendur þjálfast í hópavinnu og samskiptum
Sköpun er hvetjandi og hvetur nemendur til að ganga lengra
Sköpun höfðar til námsgreinda

Mötun í kennslu:
Ýtir undir ósjálfstæði
Nemendum leiðist frekar
Dregur úr frumkvæði

Sigurbjörg benti á nokkrar leiðir að öðruvísi kennsluháttum:
Að nota vídeó, að nota margmiðlunarforrit, að fara í hugmyndavinnu, að fara út af örkinni, að fá nemendur til að skapa að eigin frumkvæði.

Mér finnst ég hafa haft mjög gott af því að hlusta á Sigurbjörgu. Hún var áheyrileg og setti efnið skipulega fram. Hún lét heldur ekki sitja við orðin tóm og í lok málstofunnar fengum við, þátttakendur, blað og liti og lét hún okkur teikna einhvers konar tákn á það. Táknið átti að merkja hvort við værum sammála eða ósammála henni í að sköpun í skólastarfi skipti máli. Það er ekki hægt að komast hjá því að líta í eigin barm eftir að hafa hlustað á Sigurbjörgu. Það er ágætt að hrista aðeins upp í manni og skoða hvað verið er að gera á sínum vinnustað.

Laugardagur 1. mars

Ég kom inn í miðjan fyrirlestur Jóhanns Guðna Reynissonar, sveitarstjóra, Ég lifi í draumi... um tæknina og landsbyggðina. Óhætt er að segja að hann hélt óskiptri athygli gesta með líflegri framkomu sinni og framsetningu.

Næsta málefni sem ég fjalla um er fyrirlestur Kristínar Steinarsdóttur og Ingibjargar Haraldsdóttur, sem hét því grípandi nafni, Sjáðu sæta skjáinn minn.
Kristín, sem móðir fatlaðrar, 9 ára stelpu og Ingibjörg, sem kennari hennar fræddu okkur um þróunarverkefni heimilis og skóla. Nína, nemandinn hefur sína eigin fartölvu. Allar stillingar eru miðaðar við hana eina og gengur hún alltaf að tölvunni vísri í skólanum og heima. Þær lögðu mikla áherslu á hvað stillingarnar, aðkoma og frágangur tölvunnar eftir hverja notkun skiptu gríðarlegu máli og spöruðu mikinn tíma. Nína notar tölvuna á sama hátt og aðrir nemendur nota blýant og stílabók.

Þær settu sér fjögur markmið:
Að nota fjölbreyttar kennsluaðferðir með áherslu á samvinnunám.
Öflug samvinna nemanda með fartölvu
Að örva tjáningu nemandans með því að vinna með t.d. stafrænar myndir/powerpoint
Að auka virkni og sjálfstæði nemandans

Þær stöllur hittast vikulega eftir að bekkjarkennarar árgangsins hafa útbúið sína vikulegu áætlun. Þær fara yfir orðaforða tengdan námsefninu og búa hann til í forritinu Clicker. Clicker er verkfærisforrit sérstaklega aðlagað að þörfum nemandans og hannað með orðmyndir í huga. Í forritinu er mikill myndabanki. Nemendur sem nota þetta forrit læra orðmyndir og læra að raða þeim saman svo útkoman verður samfellt mál. Þannig geta þeir líka skilað af sér stílhreinum, myndrænum verkefnum eins og aðrir nemendur.
Nína notar tölvuna 8 x á viku. Tvær stundir vinnur hún ein en hinar sex stundirnar vinnur hún í samvinnu við aðra nemendur.

Þetta var frábær fyrirlestur og sýnir okkur fram á hvað öflug samvinna heimilis og skóla fær miklu áorkað á jákvæðan og uppbyggilegan hátt sé vilji beggja fyrir hendi.

Næst var að gera heiðarlega tilraun til að hlusta á Svíann Johan Strid flytja fyrirlestur sinn Living in future, implications of the information age. Það var ansi margt sem truflaði einbeitinguna. Mikið skvaldur og ráp allt í kring og líka hann sjálfur. Hann hélt ekki athygli manns.

Eftir hádegið fór ég fyrst á fyrirlestur Þórs Jóhannssonar, kennara í Borgarbyggð sem hann nefndi Farsæl þróun UT í skóla - hvað þarf til?.
Mér fannst gaman að hlusta á hann og fylgjast með því hve mikill eldmóður hann er. Hún er athygliverð samvinnan milli skóla á svæðinu. Þór er ráðinn sem kennsluráðgjafi í UT í Grunnskólanum í Borgarnesi og Varmarhlíðarskóla.

Að lokum hlustaði ég á Ásrúnu Matthíasdóttur þar sem hún gerði grein fyrir úttekt sem hún ásamt fleirum gerði á íslenskum vefsíðum. Úttekt á íslenskum vefsíðum.
Mér fannst nú einhvern veginn að hún ætti frekar að flytja fyrirlesturinn fyrir stjórnendur íslenskra fyrirtækja heldur en skólafólk nema ég nái ekki alveg beintengingunni þarna á milli.

Þetta var í annað sinn sem ég fer á UT ráðstefnu. Og er spennandi að fylgjast með því sem er að gerast meðal skólafólks hér á landi fyrir utan að maður hittir svo marga.

2003-03-09T13:34:00.000Z

Í gær fór ég inn í Kennó. Það er alltaf gaman að hitta stelpurnar og bera saman bækur sínar. Hún Kristín St. aðstoðaði mig með smá atriði sem maður festist svo aulalega í. En í sjálfu sér græddi ég ekki mikið, svona námslega. Á hádegi fór ég til mömmu og þar hittumst við systkini mín og máluðum fyrir hana öðru sinni í vetur. Eftir málunina fór ég til tengdamömmu og þaðan í mat til Rúnars.Mér fannst spaugstofan alveg einstaklega vel heppnuð í gærkveldi. Er byrjuð að vinna greinargerð um norðurferðina.

2003-03-04T20:01:00.000Z

Nú er vefleiðangrinum lokið nema hvað að ég næ engan veginn utan um suma ramma leiðangursins. Svarti ramminn fyrir neðan titilinn er auðvitað alltof stór og ég hef ekki náð að laga hann með neinum ráðum. Það sem meira er að maðurinn minn er líka búinn að liggja yfir verkefninu. Ég verð greinilega að leita að utanaðkomandi aðstoð.
Mér datt til hugar að búa til leiðangur um árlega Skagafjarðarferð 10. bekkja. Ég er viss um að það gæti orðið bráðsniðugt að nemendurnir liggi yfir svoleiðis leiðangri áður en lagt verður af stað. Skoða það.

2003-03-04T15:15:00.000Z

Mér fannst ansi gaman á Akureyri.Við hjónin nýttum okkur ferðina í orlof. Íbúðin var mjög fín, sem við leigðum af Sjómannasambandinu.
Þvílkíkt veður og bara stuð að skokka neðan úr bæ og upp í skóla og niðureftir aftur. Ég sótti nokkra bráðskemmtilega fyrirlestra og einn fyrir misskilning. Fyrirsögnin var villandi og ég hefði nú ekki nennt að að fara á þessa forritakynningu um mediator hefði ég vitað af þessu enda nóg annað og merkilegra í boði.
Annars hef ég verið í leiðangrinum síðan ég kom heim og er langt komin. Þetta er líka fyrsta bloggið því eitthvað virkaði ekki eins og vera skyldi. Ég hef reyndar ekki hugmynd um hvað.

2003-02-26T22:25:00.000Z

Ætlaði að tengja tæknisöguna yfir á skilasíðuna en fann hana ekki í augnablikinu. Ég verð að skoða þetta seinna því ég verð að undirbúa forfallakennarann fyrir föstudaginn.

2003-02-26T22:14:00.000Z

Undanfarið hef ég legið yfir vefleiðöngrunum. Fyrst ætlaði ég að vinna bókmenntaverkefni í íslensku, miðað við 10. bekk. Yfir matarborðinu eitt kvöldið velti ég vöngum um leiðangrana og verkefnið mitt. Sonur minn, 18 ára benti mér góðfúslega á að ég mætti alveg vinna verkefni sem hugsanlega höfðaði betur til nemendanna. Þeir mættu jú alveg gera skemmtileg verkefni svona í og með! Þar með fæddist þessi hugmynd um íslenskar hljómsveitir. Ég er komin vel af stað með verkefnið en næ örugglega ekki að ljúka því fyrr en ég kem til baka frá Akureyri. Náði að tengja frumdrög að skilasíðu við heimasíðuna og allir hnapparnir, af þeim sem ég hef tengt, virka nema einn sem ég verð að skoða sérstaklega. Við hjónin ætlum að leggja af stað norður á ráðstefnuna um miðjan dag á morgun og hlökkum bara til að fara í orlof!

2003-02-23T15:46:00.000Z

Í gær fór ég inn í Kennó. Lengi framan af vorum við bara 5 stelpur, hörðustu naglarnir, síðan bættist Hildur við. Heppin ég því hún aðstoðaði mig helling í dreamweaver. Sem sagt ég náði tengingu við það sem ég er að gera! Um tíma í gær fannst mér ég vera komin með margar heimasíður en sú sísta birtist alltaf. Eftir smá yfirlegu komst ég auðvitað að því að ég gleymdi að tengja og flytja gögnin. Ég lagaði til á heimasvæðinu, bjó til hnappa og dúllaði aðeins. Er komin af stað með vefleiðangurinn. Bara ánægð með dagsverkið.

2003-02-21T16:53:00.000Z

Þessa dagana er ég bara að lesa mig til, reyna fyrir mér í myndvinnslunni. Um daginn fann ég hnapp sem mér fannst sniðugur og vann smá með. En í dag finn ég hann ekki.Reyni betur eftirtiltektaræðið sem er að renna á mig þessa stundina. Fer í kvöld til sonar míns, þar sem nokkrar spurningar hafa vaknað um dreamweaver og tengingar.Um helgina ætla ég að hella mér í vefleiðangurinn. Kannski er ég komin með hugmynd. Sjáum til. Annars hef ég ekkert séð um hvort það liggur fyrir dagskrá fyrir morgundaginn.

2003-02-19T12:28:00.000Z

Í gærkveldi las ég helling frá nkn02. Las í gegnum verkefni nemenda og þrepin frá Salvöru í dreamweaver. Ég svaraði líka bréfinu frá Þórunni um þátttöku í námskeiði. Komst að því að fn takkinn í fartölvunni minni virkar ekki. Þarf að skoða það.

2003-02-17T12:41:00.000Z

Ólöf , þakka þér fyrir góðan fyrirlestur. Margt ansi athyglivert sem kom fram. Ég varð að fara fyrr því handan hornins beið mín óvissuferð með 13 öðrum stelpum úr Grindavíkurskóla. Þetta var mjög skemmtilegt frá upphafi til næstum því enda. Það var lítið sofið, alls konar misskilningur á ferð, óvæntir gestir dúkkuðu upp, sem röskuðu ró roskinna kvenna við frekar lítinn fögnuð! Í hádeginu var matarboð hjá mömmu ásamt nánustu fjölskyldu. Ég staldraði stutt við því spáin var ansi slæm og vildi ég ekki vera veðurteppt í RVK. Ég keyrði rólega en á miðri Reykjanesbrautinni, í langri bílalest, fauk skottið upp og mátti ég í pilsinu, á hælaháu skónum, í 20m/sek brjótast út. Þetta hafðist. Mun reyna að fara inn í Kennó í kvöld til að hitta vinnuhópinn. Uff, ekki veitir af!

2003-02-14T22:28:00.000Z

Er búin að skoða slóðirnar frá Salvöru en þær virka nú ekki. Annars er ég að komast í tölvuna mína eftir tveggja daga stopp. Tölvan á efri hæðinni var tekin í gegn og þar sem hún er ,,móðurtölvan" fyrir ADSL-ið tókst mér engan veginn að að tengja fartölvuna við tengingarnar. Við nánari skoðun eru ISDN tengirnar sem eru þarna líka eitthvað að trufla. Mér skilst að þetta lagist ekki fyrr en hin komi aftur í hús og allt verði stillt upp á nýtt. Ég skrapp í kvöldkaffi til sonar míns með fartölvuna til að geta tengst smá stund fyrir morgundaginn í Kennó.

2003-02-12T14:33:00.000Z

Þetta er ég þokkalega ánægð með. Nú þarf ég bara að skoða betur rammana svo þeir verði breiðari.

2003-02-11T17:52:00.000Z

Ég er að æfa mig einu sinni enn. Nú að setja inn mynd.
Hef verið síðasta klukkutímann að vinna með HTLM og blogg. Bara skemmtilegt en þarf trúlega að gera þetta nokkrum sinnum enn.

2003-02-11T16:16:00.000Z

Ég er endalaust að breyta og bæta með aðstoð míns. Ég er ótrúlega heppin að hafa hann svona áhugasaman í mínu námi.
Búið er að lagfæra bloggið, setja inn spjallglugga og teljara. Annars er nóg að gera, annaskipti hjá unglingaskólanum, heilmikil yfirferð og undirbúningur fyrir foreldraviðtölin í næstu viku. Ég er bara orðin pínu bjartsýn á framhaldið með 10. bekkina. Prófin núna sýna að þau eru farin að meðtaka boðskapinn. Í kvöld verð ég væntanlega með Kristínu St. í MSN-sambandi vegna myndvinnslu. Það verður fín upprifjun frá laugardeginum sl.

2003-02-09T11:06:00.000Z

Ég var í Kennó í gær og fannst það mjög gott. Björn kom og fór aftur í gegnum myndvinnsluna.Ég byrjaði á því að hrósa honum fyrir leiðbeiningarnar sem voru sendar til okkar í pósti rétt áður. Þetta námskeið var í raun alveg bráðgott. Margt sem hann sagði kveikti á perunni, já nú skil ég. Þegar Björn var búinn að fara í gegnum það helsta byrjuðum við Guðrún Jóna upp á nýtt til að festa í minni. Mér finnst líka skemmtilegt að hittast svona og bera saman bækurnar.
Á heimleið kom ég við í blómabúð og færði mágkonu minni í tilefni dagsins. Dagurinn í dag fer í prófayfirferð og undirbúning fyrir næstu viku. Hlakka til að þreifa mig áfram í myndvinnslunni.

2003-02-07T14:47:00.000Z

Alla inniveruna hefur minn verið að koma sér inn í bloggið, bloggspottið, macromedia-forritin og allt til að geta aðstoðað mig og unnið með mér. Honum finnst þetta bara skemmtilegt. Árangurinn sést á nýju útliti bloggsíðunnar. Þetta var nokkuð töff en hafðist. Skoðum meira í næstu viku.Er búin að fara í gegnum leiðbeiningar Björns í myndvinnslu. Þær eru ljómandi góðar að vinna með.

2003-02-05T18:36:00.000Z

Í dag komst ég að því að ég kann ekki að tjá mig á tölvumáli. Svo sem ekkert nýtt. Minn hefur verið að hjálpa til og krefst þess að ég setji skilmerkilega fram það sem ég þarf að tala um og er að vandræðast með. Viti menn, við náðum saman og hann aðstoðaði við að skipuleggja upp á nýtt. Nú virkar allt sem á að virka og ég veit svona nokkurn veginn hvar ég geymi hvað. Ég á í vandræðum með að tengja breytingar sem ég geri á index - síðunni. Tölvan mín frýs stöðugt við þá aðgerð. Alveg óþolandi.
Nú er bara að fara að skipuleggja heimasíðuna. Ég gekk frá greiðslu vegna auglýsinga á blogginu í fyrradag og hefur það strax skilað sér. Hlakka til að fara inn í Kennó á laugardaginn og þó, ég verð á þorrablóti kvöldið áður. Jæja við sjáum til.

2003-02-02T16:39:00.000Z

Ég hafði ótrúlega gott af því að fara inn í Kennó í gær. Mér fannst áður enn ég fór að ég væri sæmilega undirbúin. Ég hafði jú fengið aðstoð frá tveimur köllum ( í sitthvoru lagi), sem "kunna allt" en eitthvað hafa skilaboðin farið á mis hjá okkur. Eftir Kennóferðina verð ég einfaldlega að enduskoða samskipti mín við þá! Ég verð líka að taka mig á og grúska. það hefur mér reynst talsvert erfitt þar sem ég hef ekki haft viljann til þess hingað til. En OK það sem bjargaði deginum var að hitta saumaklúbbinn minn til 25 ára, í súpu og spjalli á Lækjarbrekku. Þeim finnst ég vera alveg rosalega klár á tölvur, gott hjá þeim. Já, ég er betri en þær allar til samans en þær kunna líka harla lítið.
Læt þetta duga í bili og held áfram að grúska.

2003-01-31T23:01:00.000Z

Er búin að vinna vefrallýið með aðstoð sonar míns og setja það inn á heimasíðuna. En ég valdi heimasíðu Ríkisútvarpsins. Ríkisútvarpið
Síðan mín þar sem vefrallýið er að finna. Vefrallý

2003-01-31T13:33:00.000Z

Hef verið að vinna með vefrallýið. Ég er ekki viss um hvort eigi bara að segja frá því sem ég er að gera hér á blogginu eða hvort það eigi að vera tenging. Það er nú reyndar trúlegra. Ætla ég að ganga frá verkefninu í kvöld og mun mæta í tölvustofuna á morgun inni í Kennó.

2003-01-28T15:48:00.000Z

Kynningin.
Ég heiti Kristín Ingeborg Mogensen. Ég fæddist og ólst upp á Selfossi 1952. Ég lauk námi í MH 1972 og frá KHÍ 1980. Síðan þá hef ég kennt að mestu leyti öll árin og hér í Grindavík síðan árið 1992. Heimasíða Grunnskóla Grindavíkur Ég hef kennt á öllum aldursstigum, flestar greinar. Mér finnst skemmtilegast að kenna þeim allra yngstu eða nemendum í 10. bekk. En sl. 4 ár hef ég verið umsjónarkennari í 10. bekk og kennt íslensku og dönsku.
Minn ektamaki heitir Sigvaldi, hann er sjómaður og rær á línu héðan úr Grindavík. Við eigum 4 börn á aldrinum 18 - 29 ára. Tvö þeirra eru búsett erlendis og eiga ensku- og norskumælandi maka. þannig að við erum í talsvert alþjóðlegum samskiptum!. Barnabörnin eru 4 og von er á því 5ta norður í Finnmörku um miðjan mars nk. Áhugamálin eru, fyrir utan vinnuna sem mér finnst langoftast mjög gaman í, golf og göngur og hvers kyns hreyfing. Við hjónin ferðuðumst um Norður-Noreg sl. sumar og almennt það sem stendur upp úr þeirri ferð eru allar göngurnar sem við fórum í.

Við eignuðumst okkar fyrstu tölvu um 1989. Þá bjuggum við á Blönduósi og gerðum okkur ferð á Akureyri til að kaupa nýjustu tölvuna á markaðnum ásamt prentara.Við höfðum einhverjar hugmyndir um að tölvur væru það sem koma skyldi og vonuðumst við til þess með framtíðina í huga að eitthvert afkvæmið myndi falla fyrir henni. Þetta gekk eftir, einn sonurinn er tölvufræðingur í dag. Tölvan var Hyundai 386, 16 mhz og 640k innra minni, sem var stækkanlegt í 2mb. Prentarinn var Star 10. Þessi kaup kostuðu rétt um kr. 200.000. Þessi tölva varð óskaplega vinsæl meðal skólafélaga en ég notaði hana nánast ekkert nema fyrir einföldustu aðgerðir. Í Grunnskóla Blönduóss voru á þessum tíma 3 gamlir makkar og einn prentari sem var geymdur á skrifstofu yfirkennarans. Sá hinn sami var með þeim fyrstu sem kynntist rafpósti og sýndi hann mér þetta undur. Ég kynntist tölvum eitthvað að ráði um 1994. þá var ein nettengd tölva í skólanum hér í Grindavík. Um vorið 1995 fór ég á nokkurra vikna námskeið hjá Tölvuskóla Suðurnesja. Þar lærði ég á Word, Excel og Internetið. Við, sem vorum á þessu námskeiði þóttumst voða góð og framúrstefnuleg í lok þess! Smám saman sá ég að þetta námskeið dugði skammt eitt og sér og hef ég sótt námskeið í Ppt, myndvinnslu og Publisher síðan. Ástæðan fyrir því að ég valdi þetta nám núna er sú að fyrir utan það að nema UST finnst mér alveg nauðsynlegt að geta tekið þátt í upplýsingatækninni með nemendum mínum.

Við erum með ADSL tengingu, sem er alveg óskaplega þægilegt.Heimilissímarnir eru tveir, einn á sitthvorri hæðinni. Við 3 í heimili erum öll með sitthvern gemsann. Ég nota minn örlítið sem skilaboðatæki og get sent sms ef á þarf að halda. Í dag er á heimilinu einn gamall tölvuræfill, sem var verið að uppfæra úr 266 mhz í 600mhz, með 256 MB minni. Ein HP-fartölva keypt ný 2001 með 256 MB innra minni, nýju batterýi og nýju netkorti. Þessa tölvu nota ég mest í náminu. Tölvupóstur er orðinn daglegur hluti og ég nota MSN spjall að jafnaði hvern dag. Ekkert smá þægilegt til samskipta t.d. við ættingja og vini í útlöndum. Við erum með tvö sjónvörp, eitt 29" 3ja ára gamalt en hitt er 22" síðan 1980. Eitt myndbandstæki og eitt dvd tæki eru bæði tengd við stóra tækið á efri hæðinni. En það verður að segjast eins og er að það er afar lítið horft á sjónvarp hér, helst Ruv og skjá1. Ég eignaðist Kodak stafræna myndavél um jólin. Þessa margauglýstu Share moments, Share life. Mér finnst hún mjög þægileg og auðveld í notkun og sé ég fram á að geta notað hana við hvaðeina sem ég er að fást við.

Sem bekkjarkennari vil ég halda úti öflugri og virkri heimasíðu. Nemendur og foreldrar eiga að geta notað hana daglega sér til framdráttar, sótt þangað allar upplýsingar um verkefni, heimanám, samstarf við heimilin og allt það er kemur þeim til góða. Ég vil hafa aðgang að skjávarpa í kennslustofunni. Ég vil geta útbúið gagnvirk verkefni og nýtt mér það sem í boði er í margmiðlun hverju sinni. Ég vil geta nýtt mér tæknina í þágu nemenda en ekki á kostnað námsins. Ég veit að þetta hljómar einkennilega en staðreyndin er einfaldlega sú að samræmdu prófin stjórna okkur ansi mikið og er ég að vona að með náminu geti ég smám saman sameinað hugmyndir mínar og upplýsingatækni í þágu nemenda.

Hvað framtíðina varðar þá sýnist mér sem stafrænar lausnir og þráðlaus samskipti séu það sem koma skal.

2003-01-27T15:34:00.000Z

Nú verð ég að hrista af mér slenið. Hef lesið undanfarið allt það sem á að gera en engan veginn komið mér að verki. Er búin að taka morgundaginn frá frá hádegi og ég bara verð! Hlakka til að blogga næst.

2003-01-22T23:05:00.000Z

Nú reyni ég í fimmta sinn að koma slóðinni inn.
Hún erhttp://www.ismennt.is/not/km

2003-01-22T22:57:00.000Z

2003-01-21T21:02:00.000Z

Tók mig til á sunnudagsmorguninn sl. og bjó til borða skv. fyrirmælum og rifjaði upp vinnuna frá því í staðbundnu lotunni.Las yfir nóturnar mínar frá sama tíma. Yfir sumu hristi ég bara hausinn, annað kveikti pínu á perunni. Fékk að lokum aðstoð við að setja inn síðuna mína með ftp tengingu.
Slóðin er http://www.ismennt.is/not/km
Það sem sést þar í augnablikinu er borðinn en ekki velútfærð heimasíða.
Hún kemur væntanlega síðar

2003-01-19T11:53:00.000Z

sjáið heimasíðuna mína

Síðan mín

2003-01-17T13:57:00.000Z

Þá er ég komin heim eftir þriggja daga lotu í KHÍ og ekki seinna vænna en að byrja einhvers staðar.Ákvað að byrja á blogginu vegna þess að það er einfaldast. Minnst að hugsa. Mér fannst gærdagurinn inni í KHÍ bara notalegur eftir tvo sérlega strembna daga þar á undan. Fyrirlestrar Þuríðar og Más fannst mér bráðgóðir. Nú bíð ég bara eftir bréfi frá Salvöru neð nákvæmum útlistunum á komandi verkefnum.

2003-01-15T14:39:00.000Z

Jæja þá er að prófa bloggið einu sinni enn. Vonandi gengur það núna.

2003-01-15T14:37:00.000Z

Reyni aftur